Covid-19: Nuup Bussiisa ilaasut killilerpaat

Ilaasut killilerneqartalissapput

Nuup Bussiisa Naalakkersuisut innersuussutaat malillugu kikkunnut tamanut ilaasartaatini tuniluuttoqarnissaa pinaveersaartinniarlugu aqagu tallimanngorneq marsip 13-iat aallarnerlugu bussini issiavissanut naammatsiinnarlugu ilaasut killilerneqartalissapput. Tassa imaappoq, nalinginnaasumik bussini ilaasinnaasut affai ataallugit ilaasoqarsinnaanngormat.

“Nalunngilarput, ilaasut amerlassusaannik killiliineq annertuumik akornuusiissammat, maannakkulli misissorlugu aallartippugut angallattoqarnerata nalaani ilaasinnaasut amerlanerutissinnaanerlugit” Taamaattorli aamma ilaasartugut kaammattorusuppavut, angallaffiunerusup nalaani tassa nal. 7.00-ip 8.30-llu akornanni sapinngisamik bussernaveersaaqqullugit”, taama oqarpoq Nuup Bussiini pisortaq Mogens Nathansen.

Billitsimik ataasiinnarmik tuniniaaneq unitsinneqassaaq

Nuup Bussii tunillaassuuttoqarsinnaanera killilersimaarniarlugu ataasinngorpat allamik atuutilersitsissaaq. Bussini billitsinik aningaasanik akilerlugu pisisoqarsinnaajunnaassaaq. Utaqqiisaasutut atuuttussamik tallimanik imalimmik klippekortisisinnaanissaq anguniarparput sumiiffinni pisiffiusartuni pisisoqarsinnaanngussaaq – kisianni suli naammassingilaq taanna.

”Coronamik tuniluuttoqarsinnaanera pakkersimaarniarlugu billitsimik ataasiinnarmik tuniniaaneq unitsinneqassaaq. Taamatut iliuuseqarneq pissutsini nalinginnaanngitsuni ilaasartugut aquttugullu illersorniarlugit pivoq. Peqatigitilluguttaaq taamatut iliuuseqarpugut ilaasartutsinni aquttutsinnilu ernumaneq annertusiartuinnartoq tusaaniarniarlugu”, Mogens Nathansen oqarpoq.

Taamatut iliuuseqarnerup qanoq sivisutiginissaa maannakkumuugallartumik oqaatigineqarsinnaanngilaq, naatsorsuutigineqassaarli tuniluuttoqarsinnaanera sapinngisamik pakkersimaarniarlugu allatigut aamma iliuuseqartoqassasoq.

 
Malugiuk angallassinerit allannguuteqarmata. Quppernermi uani angallassinerit takukkit.

Facebook-imi quppernitsinni allannguinermi aamma siammaterisarpugut. Uani malinnaagit.